नेपालगन्ज १४ कात्तिक । जिल्ला प्रशासन कार्यालय बाँकेले आफ्नो कार्यालयबाट प्रदान हुने सेवा सुविधाको छिटो छरितो र गुणस्तरियता बनाउन थालेको छ । सेवाग्राहीलाई छिटो छरितो र प्रभावकारी सेवाका लागि प्रशासनले आफ्ना सम्पुर्ण सेवाहरुलाई प्रभावकारी बनाउन थालेको हो ।
केहीदिन अघि मात्र जिल्लाको प्रमखको रुपमा आउनुभएका दक्ष प्रशासक श्रवणकुमार पोखरेलले जिल्लामा सब भन्दा पहिला जिल्ला प्रशासन कार्यालयको सेवा प्रवाहलाई सुशासन र गुणस्तरियत बनाउनु थाल्नु भएको हो । उहाँले जिल्लाको कमाण्ड सम्हाल्ने वित्तिकै जिल्लाको शान्ति, सुरक्षा, सामाजिक सदभाव, सुशासन, सेवाको प्रभावकारितालाई विशेष योजनाका साथ काम गर्न थालेको प्रजिअ पोखरेलले बताउनुभयो ।
उहाँले भन्नुभयो, “बाँकेमा म आउने वित्तिकै शुरुमा सामाजिक सदभावको बाताबरणलाई बलियो बनाउन विशेष पहल गरेको छु, शान्ति सुरक्षासंगै सदभावको आधार बालियो बनाउन विभिन्न निकायसंग छलफल गरेको छु र त्यसैको आधारमा योजनाका साथ अघि बढेको छु, यसमा सबैको सहयोग र साथको आवश्यकता छ उहाँले भन्नुभयो ।
प्रजिअ पोखरेलले जिल्लाका विभिन्न कार्यालयहरुमा सुशासन र सेवाको गुणस्तरियतामा समेत ध्यान दिएको भन्दै पहिला आफ्नै कार्यालयको सेवा चुस्त दुरुस्त बनाएपछि मात्र अरु कार्यालयतर्फ लाग्ने योजना रहेको बताउनुभयो । प्रशासले राहदानी र राष्ट्रिय परिचयपत्रको फाराम भर्न झन्झटिलो रहेकोमा अब प्रशासनले निःशुल्क फाराम भरिदिने ब्यवस्था मिलाएको हो ।
राहदानी र राष्ट्रिय परिचयपत्रको अनलाइन फाराम कार्यालय परिसरभित्रै निःशुल्क भर्नका लागि कर्मचारीलाई जिम्मेवारी दिइएको प्रमुख जिल्ला अधिकारी श्रवणकुमार पोखरेलले जानकारी दिनुभयो । उहाँले भन्नुभयो, ‘सेवाग्राहीले आफ्नो प्रमाण लिएर कार्यालयमा पुगेमा सम्बन्धित फाँटबाटै निःशुल्क फाराम भर्ने व्यवस्था मिलाइएको छ ।’ फाराम भर्नका लागि अतिरिक्त समय र ब्ययभार नलाग्ने भएपछि सेवाग्राही खुशी भएका छन् ।”
राष्ट्रिय परिचयपत्रसहित राहदानीको पनि अनलाइन फारम जिल्ला प्रशासनले नै निःशुल्क भरिदिने व्यवस्थाको सुरुवात गरिएको छ । फाराम भरेकै दिन फोटो समेत खिच्ने गरिएको छ । राजस्व रकम तिरेर एकै दिनमा सेवा पाउने प्रशासनले जनाएको छ । राष्ट्रिय परिचयपत्रको अनलाइन फारम पनि प्रशासनका कर्मचारीले निःशुल्क भरिदिने भएकाले एक रुपियाँ पनि खर्च नभई एकै दिनमा काम सम्पन्न हुने प्रमुख जिल्ला अधिकारी पोखरेलले बताउनुभयो ।
बाँकेमा हालसम्म कुल ३१ हजार ६०५ थान तयारी राष्ट्रिय परिचय पत्र प्राप्त भएको प्रशासनले जनाएको छ । त्यसमध्ये अहिलेसम्म ७६५ थान वितरण भइसकेको प्रजिअ पोखरेलले बताउनुभयो । उहाँका अनुसार भोली बुधबारदेखि प्रत्येक दुई दिनको फरकमा ५०० जनाको नामावली समेत प्रकाशित गर्ने तयारी गरिएको छ ।
