नेपालगञ्ज । बाँके र बर्दियामा थालसेमियाका विरामीको पहिचान खुल्न  थालेको छ । 
बाँके र बर्दियाका विभिन्न स्थानीय तहले यसको जाँच सुरु गरेपछि थालसेमियाका विरामीको पहिचान खुल्न थालेको भेरी अस्पताल, नेपालगञ्जका प्रमुख कन्सल्टेन्ट फिजिसियन डा. राजन पाण्डेले जानकारी दिनुभयो । 
जिल्लाको कोहलपुर नगरपालिका, नेपालगञ्ज उपमहानगरपालिका र बर्दियाको बारबर्दिया नगरपालिका र राजापुर नगरपालिकामा स्क्रिनिङ परीक्षणपछि विरामीको पहिचान भएकाले थालसेमियाका विरामीको सङ्ख्या समेत वढन थालेको फिजिसियन डा. पाण्डे बताउनुहुन्छ । उहाँले थालसेमिया र सिकलसेल एनिमिया एउटा सिक्काको दुई पाटा भएको उल्लेख गर्दै केही वर्ष यतादेखि भेरी अस्पतालमा निशुल्क परीक्षण भइरहेको बताउनुभयो । 
भेरी अस्पताल, नेपालगञ्जमा अहिले थालसेमियाका दैनिक विरामी आउने गरेका छन । उनीहरुमा जण्डिस, ज्वरो आउने, श्वासप्रश्वासमा समस्या आउने लगायतका लक्षण देखिएको भेरी अस्पतालका सूचना अधिकारी डा. संकेत रिसालले बताउनुभयो । 
थालसेमियाको रोगका लागि रगत विशेषज्ञ नभएको उल्लेख गर्दै उहाँले फिजिसियन चिकित्सकले विरामी हेरिरहेको बताउनुभयो । 
थालसेमिया सिकलसेल जस्तै रगतसँग सम्वन्धित रोग हो । सरकारले सिकलसेललाई जनस्वास्थयको समस्याको रुपमा परिभाषा गर्दै रु. १ लाखसम्मको औषधी निशुल्क प्रदान गर्दै आएको छ । तर थालसेमियाका विरामीले सो सुविधा पाएका छैनन । 
थालसेमियाका विरामीको उपचारमा संलग्न नवजात शिशु तथा बाल रोग विशेषज्ञ डा रोमा बोराले पछिल्लो समय बालबालिकामा रगतको कमी हुने थालसेमिया जस्तो रक्त अल्पताको समस्या लिएर विरामी आउने गरेको बताउनुभयो । 
उहाँले अहिले करिव ६५ जना थालसेमियाबाट पीडित बालबालिका उपचारको लागि आएको र यीमध्ये करिव १४ जना नेपालगञ्जका विभिन्न समुदायका रहेको जानकारी दिनुभयो । सो रोगका ८० प्रतिशत विरामी थारु समुदायको र २० प्रतिशत अन्य समुदायको रहेको बताइएको छ । त्यसमा थारु, मुश्लिम, जनजाती, मधेसी सुमदायका रहेका छन । 
नेपालगञ्जमा निजि क्षेत्रबाट सञ्चालित कान्ति आरेग्य अस्पतालमा आउने थाल्सेमियाका विरामीलाई बेड चार्जदेखि डाक्टरको फिस र कुरुवा बस्ने सुबिधा निशुल्क रुपले उपलब्ध गराएको गराएको छ ।
बर्दियाका फकिरे थारुले थालसेमियका विरामीलाई राज्यले निशुल्क औषधी तथा उपचारको प्रवन्ध गर्न माग गदै रगत अभाव हुँदा खोज्न, आइरन जाँच गर्न समस्या भोगेको बताउनुभयो ।