बाँके, ८ पुस : नेपाली काँग्रेसका सहमहामन्त्री किशोर सिह राठौरले प्रतिनिधीसभाको चुनाव फागुन २१ गते नै हुनेपर्ने बताउनुभएको छ ।
नेपाली काँग्रेसका पुर्व सभापति तथा पुर्व प्रधानमन्त्री सन्त नेता स्व कृष्णप्रसाद भट्टराईको १०२औं जन्मजयन्ती एव नेपाली काँग्रेस बाँकेद्वारा निर्माण भएको सुशील कोईराला स्मृति भवनको आज यहाँ उद्घाटन गर्दै सहमहामन्त्री राठौरले मुलुक र लोकतन्त्र जटिल अवस्थामा पुगेकाले आपसी मतभेद बिर्सेर सिंगो नेपाली काँग्रेस फाल्गुण २१ गतेका लागि तोकिएको निर्वाचनमा जुट्नु पर्ने बताउनुभयो ।
सहमहामन्त्री राठौरले काँग्रेसले ८० वर्ष संघर्ष गरेर सुनिश्चित गरेको लोकतन्त्र र जनताको अधिकार अप्ठेरोमा परेकाले त्यसलाई ट्रयाकमा ल्याउन निर्वाचन सबैभन्दा उत्तम विकल्प भएको बताउनुभयो ।
उहाँले हाल जारी क्रियाशील सदस्यता वितरणसहित पार्टी महाधिवेशनलाई पनि फाल्गुन २१ मा देश र पार्टीलाई विजयी बनाउने अभियानका रुपमा अघि बढाउन आग्रह गर्नुभयो ।
उहाँले काँग्रेसको नेतृत्वमा जनअधिकारको बहाली, शान्ति स्थापना तथा विकासका काम भए पनि भ्रष्टाचार नियन्त्रण, सुशासन र जनताको सेवाका लागि खोलिएका कार्यालयहरुलाई जनतामैत्री बनाउन नसकिएका कारण जनतामा असन्तुष्टि बढेको उल्लेख गर्नुभयो ।
उहाँले भन्नुभयो–‘जनताको असन्तुष्टि र आकाँक्षा सम्वोधन गर्न काँग्रेसले नै पहलकदमी लिनु पर्छ ।’ आज नेपालमा मात्र नभई विश्वमै भ्रष्टाचार नियन्त्रण र सुशासनको मुद्दा पेचिलो बनेको छ, यो अवस्थामा कसैले भन्दैमा विद्यमान परिस्थितिमै आजका भोलि सबै समस्या समाधान हुन्दैन,’ भन्नुभयो ।
सहमहामन्त्री राठौरले दलहरुले कानूनको कार्यान्वयन र जीवनशैलीमा परिवर्तनलाई मुद्दाकै रुपमा अघि बढाएर मुलुकमा सुशासन दिनु पर्ने जोड दिदैै उहाँले स्वर्गीय नेताहरु कृष्णप्रसाद भट्टराई र सुशील कोइरालाले अपनाएको र देखाएको सादाजीवन ः उच्च विचारको परिपालना नै मुलुकलाई सुशासन, सामाजिक न्याय र राष्ट्रहितको मार्ग पहिल्याउने उपयुक्त बाटो भएको बताउनुभयो ।
जिल्ला पार्टी सभापति नारायण गौडेलको अध्यक्षतामा भएको कार्यक्रममा केन्द्रीय सदस्यहरु दिपक गिरी, सञ्जय गौतम गोपाल दहित र मान बहादुर बिक लगायतले बोल्नुभएको थियो ।
रु १ कराड २० लाखको लागतमा काँग्रेस बाँकेले लिफ्टसहितको तीन तले पार्टी कार्यालय निमार्ण गरेको सचिव सुधाम्सु कोइरालाले जानकारी दिनुभयो ।
