बर्दिया ३० चैत । बर्दियाको गुलरिया नगरपालिका वडा नं। ७ बस्ने जय हरियाली अभियन्ता तथा संचारकर्मी कमल राज पौडेल देवकमल र अधिकारकर्मी मनिष गुप्ताले वन विनाश गर्दै कालोपत्रे सडक बनाउने तयारी भईरहेको बताउँदै जिल्ला प्रशासन कार्यालय, बर्दिया, डिभिजन वन कार्यालय, बर्दिया र राष्ट्रिय मानव अधिकार आयोग प्रदेश कार्यालय, नेपालगंज, बाँकेलाई आवश्यक कारवाहीको माग सहित वातावरण संरक्षणका लागि ध्यानाकर्षण गराउनुभएको छ । 

जिल्लाको गुलरिया नगरपालिका वडा नं। १२ अन्तर्गत विक्री भवानी सामुदायिक वन उपभोक्ता समिति र बारबर्दिया नगरपालिका वडा नं। ११ स्थित काला बेलभार सामुदायिक वन क्षेत्रभित्र गैरकानुनी रूपमा वन फडानी गर्दै कालोपत्रे सडक निर्माणको तयारी भइरहेको जानकारी गराउँदै उक्त कार्यप्रति अभियन्ता पौडेल र अधिकारकर्मी गुप्ताले आपत्ति जनाउनु भएको हो ।

उहाँहरुले उक्त कार्य तत्काल रोक्न माग गर्नुभएको छ । निवेदनमा वातावरण संरक्षण ऐन, वन ऐन र नेपालको संविधानले प्रत्येक नागरिकलाई दिएको स्वच्छ वातावरणमा बाँच्ने अधिकारको उल्लंघन गर्दै वन फडानीको तयारी भइरहेको उल्लेख छ । सडक निर्माण आवश्यक भए पनि त्यसको वैज्ञानिक अध्ययन, वातावरणीय प्रभाव मूल्याङ्कन र कानुनी प्रक्रिया नअपनाई जंगल मास्नु गम्भीर विषय हो, मागपत्रमा भनिएको छ ।

उहाँहरुले निवेदनमा भन्नुभएको छ, यदि सम्बन्धित निकायले समयमै हस्तक्षेप नगरेमा सामुदायिक वनको संरचना, जैविक विविधता र वातावरणीय सन्तुलनमा गम्भीर असर पर्नेछ ।

निवेदकहरूले राष्ट्रिय मानवअधिकार आयोग मार्फत तत्काल सो अवैधानिक कार्य रोकी वातावरण संरक्षण सुनिश्चित गर्न आग्रह गर्नुभएको छ । यदि यस विषय प्रति गम्भीर नभए आफुहरु उच्च अदालत सम्म जाने कुरा समेत उहाँहरुले प्रष्ट पार्नुभयो ।