नेपालगन्ज, १६ चैत । मानव अधिकार उल्लङ्घन तथा ज्यादतीका घटनाहरूको न्यूनिकरणका लागि सम्पुर्ण सरोकारवाला निकायले ध्यान दिनु पर्नेमा जोड दिइएको छ । मानव अधिकारको सवाल हरेक विषयसंग जोडिएकाले सबै क्षेत्रमा अधिकारको रक्षाका लागि सबैको भुमिका महत्वपुर्ण हुने एक कार्यक्रममा जोड दिइएको हो । 

डिसिएको सहयोगमा अनौपचारिक क्षेत्र सेवा केन्द्र (इन्सेक)ले आज नेपालगन्जमा आयोजना गरेको लुम्विनी प्रदेशको मानव अधिकार आवस्था विषयक अन्तरक्रियाका सहभागी सरोकारवालाले मानव अधिकारको विषय गम्भीर विषय भएकाले हरेक स्थानमा यसप्रति बढी चनाखो हुनुपर्ने बताएका थिए ।

उनीहरुले मानिसको सम्पुर्ण अधिकारलाई रक्षा गरि कुनैपनि किसिमका हिंसा तथा दुरुव्यहवार गर्न नहुने कुरामा जोड दिदै विशेष गरि कार्यान्वयन गर्ने निकायले यसप्रति बढी जिम्मेवार बन्नुपर्ने बताएका थिए । 

कार्यक्रममा बाँकेका सहायक प्रमुख जिल्ला अधिकारी जोरासिंह माझी, प्रहरी नायब उपरिक्षक नारायण डाँगीले मानव अधिकारको विषयसंग जोडिएर प्रहरी प्रशासनमा आउने विभिन्न प्रकृतिका घटनाहरुका बारेमा बढी चनाखो कार्य गरिरहेको बताउनुभयो । 

कार्यक्रममा राष्ट्रिय मानव अधिकार आयोग नेपालगन्जका प्रमुख द्धारिका अधिकारी, अधिकारकर्मीहरु कृष्णमरारी प्रसाद भट्ट, विश्वजित तिवारी, बसन्त गौतम, विकास आचार्य, प्रभातसिंह ठकुरी, प्रकाश उपाध्याय, कमला पन्त लगायतले नागरिकको मानव अधिकारका लागि सम्बन्धित सरोकारवाला निकायलाई खबरदारी गर्नुका साथै मानव अधिकार प्रत्याभुतिका लागि साझेदारी गर्ने गरेको बताउनु भयो । 

कार्यक्रममा इन्सेकका लुम्विनी प्रदेश संयोजक भोला महतले लुम्विनी प्रदेशमा मानव अधिकारको अवस्थाका बारेमा जानकारी गराउनु भएको थियो । 

लुम्विनी प्रदेशमा मानव अधिकार उल्लङ्घनका घटना बढी हुने गरेको छ । इन्सेकका अनुसार एक वर्षको अवधीमा महिला अधिकारसम्वन्धीका घटना उच्च रहेको छ । एक वर्षमा एक हजार ६ सय १२ वटा घटना घटेको तथ्यांक छ भने दोस्रो स्थानमा तीन सय ४ वटा बाल अधिकार सम्वन्धी घटना घटेको जनाइएको छ । 

लुम्विनी प्रदेशमा एक वर्षको अवधीमा अपहरण, बाल अधिकार, अमानविय व्यवहार, कुटपिट, महिला अधिकार, कारागारमा मृत्यु, हिरासतमा मृत्यु, सबै प्रकारका जातिय विभेद, गिरफ्तारी, घाइते, धम्की, वेपत्ता, हत्या लगायतका प्रकृतिका घटना गरि कुल दुई हजार ८३ वटा घटना भएको इन्सेकले तथ्यांक सार्वजनिक गरेको छ ।